OnePlus е кинеска компанија која стана популарна со продажбата на премиум Android смартфони со популарниот Cyanogen OS. Иако, соработката подоцна беше прекината, па телефоните сега доаѓаат со сопствениот Oxygen OS, телефоните ја задржаа својата популарност поради добрите карактеристики, едноставниот Android систем без многу промени и се разбира карактеристично за кинеските производители, прилично пониска цена од конкурентите.
Наредниот модел од компанијата треба да биде претставен ова лето и тоа на помалку од година дена од претставувањето на претходниот модел, OnePlus 3T.
Од компанијата ги известија сите заинтересирани корисници дека тие ги продаваат последните OnePlus 3T уреди кои ги имаат на залиха, па уште малку овој модел нема да може да се купи, освен се разбира на старо.
OnePlus 5 се очекува да дојде со најновиот моментално достапен чип од Qualcomm, односно Snapdragon 835, 6-8 GB RAM меморија, Quad HD екран, а според најновите протечени информации, двојна камера на задната страна.
Извор: TechnoBuffalo, Inquisitr, OnePlus