Вчера пишувавме за првиот телефон на планетата кој нема да ви ја замрзне крвта кога ќе ви падне на подот, но известивме дека ќе биде достапен само на Verizon мрежата во САД. Сепак, за среќа на сите корисниците со лизгави раце, Motorola ќе лансира и интернационална верзија, која многу веројатно ќе ја видиме и кај нашите оператори, а која ќе се вика X Force.
Спецификациите и надворешниот дизајн ќе бидат целосно исти и ќе биде променето само името. Да потсетиме, зад нескршливото стакло и екранот со големина од 5,4 инчи и резолуција од 2560х1440 пиксели, работи Snapdragon 810 процесор, помогнат од 3 GB рам меморија, 32 GB простор за складирање податоци (достапен и модел со 64 GB) со можност за проширување преку micro SD картичка, задна камера со сензор од 21 мегапиксел и предна со 5 мегапиксели, како и Android Lollipop 5.1 оперативен систем.
Moto X Force ќе може да се пофали и со долго траење на батеријата (3750 mAh) – Motorola ветува два дена користење со едно полнење, а и самото полнење треба да е исклучително брзо – со 15 минути на полнач, телефонот може да трае до 13 часа. Импресивно.
Цената на Moto X Force во Велика Британија ќе изнесува 499 фунти за моделот со 32 GB, односно 534 фунти за моделот со 64 GB простор и ќе биде достапен во Vodafone. Се уште немаме информации за тоа дали ќе биде достапен и кај нас, но еве еден официјален повик до операторите да го донесат овој телефон, бидејќи ако ме прашувате мене, вреди за парите.
Извор: Android Central, PC World
