Apple последните години го задржуваат проверениот изглед на нивниот најдобар и најпродаван производ, iPhone. Уште од iPhone 6 и 6 Plus моделите немаме видено драстичен редизајн на смартфоните на Apple.
На неполна година до лансирањето на iPhone 8 се појавија голем број на информации и шпекулации за тоа како би изгледал најновиот модел. Според тоа што можеме да прочитаме на интернет од најразлични блогери и твитерџии, можеме да заклучиме дека новиот iPhone ќе биде одличен.
2017-та е јубилејна година за Apple кога е во прашање iPhone, бидејќи во 2007-ма Steve Jobs за прв пат го претстави и сите беа изненадени и импресионирани. 10 години откако првиот iPhone беше претставен на светот, па Apple сакаат тоа да го одбележат на најспектакуларен можен начин.
Некако во последните години како да спласна инвентивноста на Apple, па и возбудата кај корисниците кога е во прашање претставувањето на новите модели. Во 2017-та очекувам повторно да видиме некои нови, инвентивни и возбудливи новости од компанијата од Купертино.
Иако неофицијално се тестираат 10 различни модели, се очекува да бидат претставени 3 различни модели на iPhone, од кој едниот ќе биде со заоблен OLED екран и тој ќе биде претставен како Premium модел, па најверојатно и цената ќе биде Premium. Ќе биде вграден до сега најмоќниот и најбрзиот А11 процесор со дополнителниот M11 ко-процесор кој служи за следење на податоците од вградените акцелерометар, жироскоп и компас и на тој начин се намалува потрошувачката на батеријата и се ослободува главниот процесор за побитни операции.
Jony Ive веќе подолго време сака да претстави iPhone што ќе изгледа како едно парче стакло и најверојатно оваа 2017-та година ќе се исполни неговата желба. Целиот телефон ќе биде едно парче стакло со вградена камера и Touch ID и нема да има Home Button. Се надевам дека недостатокот на Home Button Apple добро ќе го изведат. Доколку целото куќиште биде изработено од стакло, тогаш можеме да очекуваме и безжично полнење на новиот iPhone 8. Најверојатно заоблениот пластичен OLED екран ќе биде со дополнителни функции на рабовите, нешто слично како Touch Bar-от кај новите MacBook компјутери.
Со новиот процесор и вградената камера се шпекулира дека е можно да се воведе и распознавање на лице или на зеница.
Се очекува два модели да останат со истите димензии како претходните. Едниот да биде со 4.7” и другиот со 5.5”. Но, за третиот модел се шпекулира дека ќе биде со 5.8” поради заоблениот OLED екран и функциите на допир кои ќе бидат на рабовите. Покрај досега познатите бои, се шпекулира дека ќе биде претставена и нова црвена боја.
Без двоумење, Apple во 2017-та ќе претстави смартфон кој повторно ќе изненади, бидејќи и самите знаат дека тоа мора да се случи доколку сакаат да останат лидери на пазарот.
