Apple прилично касно ја донесува технологијата за безжично полнење кај своите паметни телефони и ако може да се верува на најновите информации за нивниот нов iPhone 8 смартфон, таа ќе биде двојно побавна од безжичното полнење кај конкуренцијата.

За мене искрено ова и не е особено големо изненадување – iPhone смартфоните веќе подолго време имаат и бавно стандардно полнење, за разлика од скоро секој Android конкурент од високата класа, кој сигурно има некоја форма на брзо полнење, која овозможува да ја наполните батеријата за околу еден час.

Имено, информациите од Mac Otakara велат дека новиот стандард за безжично полнење на Apple ќе има моќност од 7,5 вати, што е половина од моќноста на Qi стандардот кој го користат поголемиот дел на Android смартфони и кој има моќност од 15 вати. Во превод, кога ќе го полните безжично, на новиот iPhone 8 ќе му треба двојно подолго време отколку на Galaxy S8 на пример.

Покрај тоа што безжичното полнење на Apple ќе биде побавно, тоа ќе биде и целосно нов стандард, што значи дека iPhone смартфоните нема да работат со широко распространетиот Qi стандард. Ова значи дека доколку веќе имате Qi полнач (кој може безжично да ги полни актуелните iPhone-и со Qi футрола), нема да можете да го користите со вашиот нов iPhone 8 (или iPhone 7S, односно iPhone 7S Plus), туку ќе мора да купите нов (и веројатно скап) безжичен полнач.

Извор: MacRumors, TechnoBuffalo, Mac Otakara

Претходна статијаWindows 10 нема да ги симнува датотеките за надградба без согласност од корисникот
Следна статијаDisplayMate: Galaxy Note 8 има најдобар дисплеј на пазарот