Тајванскиот производител последниве неколку месеци е во голема офанзива на пазарот, почнувајќи со VR уредот Vive, потоа со знаменосецот HTC 10, а сега со нов 5 инчен алуминиумски уред од средната класа, кој има солидни спецификации и прилично допадлив дизајн.
HTC One S9 се придружува на плејадата “One” уреди, сите изработени од алуминиум, што веќе се покажува дека е специјалност на производителот. Овој модел во задниот дел е особено сличен на минатогодишниот знаменосец One M9, но предниот дел добива малку различен дизајн, односно тука различно се изведени предните BoomSound звучници.
Внатрешните компоненти се солидни, но веројатно нема да ви го забрзаат срцето. Процесорот е MediaTek Helio X10, кој има осум Cortex-A53 јадра на 2.0 GHz, помогнат од 2 GB рам меморија и само 16 GB простор за податоци, кој за среќа може да се прошири со micro SD картичка. Дисплејот има големина од 5 инчи и Full HD резолуција, што е солидно со оглед на класата.
Задната камера, барем на хартија, делува одлично – има 13 мегапиксели и f2.0 бленда и оптичка стабилизација за подобри слики навечер, додека предната камера има 4 „ултрапиксели“ и исто така f2.0 бленда. Батеријата има солиден капацитет од 2.840 mAh, што би требало да биде доволно за цел ден користење.
One S9 ќе доаѓа со вргаден Android Marshmallow и веројатно ќе добие надградба на Android N кога ќе биде достапна. Цената изнесува 499 евра во Германија, што е прилично високо, особено ако го споредиме со кинеската конкуренција, која реално нуди многу повеќе за истите пари.
Извор: GSM Arena, The Verge, Android Authority