Asus не е производител кој прв паѓа на памет кога ќе помислите на смартфон, но е компанија која има доволно реноме во светот на технологијата за да може да привлече поголема група на купувачи. Всушност, нивната ZenFone линија, која нуди одлични спецификации за ниски цени има особено верна публика, која сигурно петте нови смартфони кои ги претставува Asus ќе ги дочека со особено внимание.
Носител на новата линија е ZenFone 4 Pro, смартфон кој ќе се натпреварува во високата класа и кој има Snapdragon 835 процесор помогнат од 6 GB рам меморија. Назад ZenFone 4 Pro доаѓа и со двојна камера, која овозможува 10х зум со висок квалитет и е комбинација на Sony IMX362 сензор со 12 мегапиксели и леќа со f/1.7 бленда, како и сензор со 16 мегапиксели со повеќе зум. Предната камера има мошне солидни 8 мегапиксели со f/1.9 бленда и супер брзо автофокус. ZenFone 4 Pro е опремен со AMOLED дисплеј со Full HD резолуција и големина од 5,5 инчи, додека батеријата има капацитет од 3.600 mAh.
ZenFone 4 е малку послаб уред од знаменосецот. Тој доаѓа со IPS LCD дисплеј од 5,5 инчи и Full HD резолуција, Snapdragon 630 или 660 процесор, 4 или 6 GB рам и двојна камера позади. Сепак, тука втората камера има супер широк агол наместо зум, што за многу корисници може да биде и подобро решение, додека предната камера останува на 8 мегапиксели. ZenFone 4 има батерија со капацитет од 3.300 mAh.
За оние кои сакаат долго траење на батеријата, Asus ги нуди и ZenFone 4 Max и Max Pro, смартфони со капацитет на батеријата од 5.000 mAh. ZenFone 4 Max и Max Pro имаат дисплеј со големина од 5,5 инчи и Snapdragon 425 или 430 процесор, 4 GB рам меморија и избор на 16, 32 или 64 GB простор. Разликата меѓу двата модели е што Max Pro има камери со 16 мегапиксели напред и назад, додека обичниот модел има камери со 13 мегапиксели.
На крај, не помалку важен е и новиот модел наменет за селфи ентузијастите, нормално наречен ZenFone 4 Selfie. Се работи за смартфон од средната класа кој има 5,5 инчен дисплеј со Full HD резолуција, Snapdragon 430 процесор, 4 GB рам и 64 GB простор. Главна негова одлика е предната камера од 20 мегапиксели, која има подобри спецификации дури и од задната камера со 16 мегапиксели. ZenFone 4 Selfie има батерија со капацитет од 3.000 mAh.
