Доаѓаат годините на зборување со компјутерите, односно уредите околу нас – денес секој оперативен систем има свој дигитален помошник, а Amazon еден таков има вградено дури и во Bluetooth звучник (Alexa во звучникот Echo), кој можете да го користите за најразлични информации од светот и дури и за купување на работи од Amazon.
Како производител кој сака апсолутно да се натпреварува во секое поле на технологијата, Samsung спрема ваков звучник. Нивниот ќе биде многу помал и ќе може лесно да се носи во помала торбичка, но ќе има многу можности. Бидејќи сѐ уште не е официјално претставен, не можеме да потврдиме кој дигитален асистент ќе го користи, но скоро сум сигурен дека тоа ќе биде Google Now – нивниот S Voice беше промашување, Siri работи само на “i” уреди, додека Cortana само на Windows уреди.
Користењето на дигиталниот асистент ќе биде многу лесно – ќе треба само да му се обратите (на пример “Hey Google”) и да му кажете команда. Со звучникот ќе може да пребарувате на интернет и да добивате говорни информации за тоа што го пребарувате, да нарачате да ви пушти некоја песна од вашиот телефон или апликација за музички стриминг итн. Секако, Scoop ќе може да се користи и како стандарден Bluetooth звучник, исто како што тоа го правите со сите останати вакви апарати.
Останатите спецификации, како траењето на батеријата и моќноста на вградениот звучник не ни се познати, но очекувам да биде солиден и во двете категории – сепак се работи за Samsung. Исто така, тие сѐ уште немаат потврдено дека овој уред воопшто ќе излезе на пазарот – може да се работи само за прототип кој воопшто и го нема добиено зеленото светло… Како и да е, сигурен сум дека ќе дознаеме во наредните неколку месеци.
Извор: Venture Beat, The Verge, ARS Technica
