Една од главните одлики на новите Galaxy S8 модели на Samsung, покрај извонредниот дизајн и перформанси, ќе биде можноста телефонот да се користи како десктоп компјутер. Како и со многу такви решенија досега во Windows 10 Mobile светот, оваа функционалност најдобро ќе се искористи со специјална десктоп станица, наречена DeX Station.
Dex Station е прилично моќна станица, која вклучува две USB 2.0 порти за поврзување надворешни уреди, како на пример маус, тастатура или поголем диск, HDMI порта за приклучување на поголем монитор со максимална 4K резолуција при 30 Hz (што значи дека ќе биде HDMI 1.4), Ethernet порта за побрз интернет и USB Type-C порта за полнење на телефонот.
Голем недостаток на оваа станица сепак ќе биде цената, која ќе изнесува 150 евра во Европа, барем според протечените информации. Ова е прилично висока цена, за која може да се купи посебен Chromebook лаптоп. Сепак, корисниците на Galaxy S8 и S8+ веќе ќе имаат платено голема сума за своите смартфони, па може да се очекува дека ќе одделат и повеќе пари за вакви додатоци.
Сега само останува да видиме каков ќе биде интерфејсот на Galaxy S8 кога ќе се приклучи на поголем монитор. Бидејќи Samsung се одлучи да ја понуди оваа функција во својот нов знаменосец (пардон, два знаменосци), очекувам да имаат изработено специјален интерфејс врз Android кој ќе личи многу повеќе на Chrome OS и Windows, со цел да биде оптимизиран за работа со маус и тастатура.
Извор: The Next Web, Winfuture, Slash Leaks
