Уредите за виртуелна реалност ги заземаат сите насловни страни денес, но и покрај обидите со Cardboard иницијативата, Google не е дел од нив. Затоа, тие го лансираат Daydream, кој ќе овозможи исклучително виртуелно доживување и кој ќе биде достапен на многу телефони од високите класи со Android N од есен годинава.
Daydream е повеќе платформа, вградена во Android оперативниот систем, која ќе се грижи за сите апликации поврзани со виртуелна реалност. Поточно, Daydream целосно ќе ги преземе работите кога телефонот ќе се стави во уред за гледање на виртуелна реалност и преку него може целосно да се управува со оперативниот систем.
За разлика од досегашните VR обиди на Google, Daydream ќе има и посебен контролер кој покрај управување со корисничкиот интерфејс, ќе може да се користи и за играње на најразлични игри. Исто така, платформата ќе има посебни хардверски побарувања, кои нема да можат да ги исполнат актуелните паметни телефони, бидејќи ги немаат сите потребни сензори.
Новите телефони со Daydream пак најверојатно ќе бидат од високите класи, бидејќи VR апликациите како YouTube, Street View, Play Movies и Google Photos бараат помоќни процесори, а тоа особено важи за VR игрите, кои кај конкуренцијата како Oculus Rift и HTC Vive функционираат само на моќни гејмерски компјутери.
Идејата зад повисоките хадрверски побарувања е едноставна – подобро VR искуство, со поголема резолуција и помало каснење на сликата. Google инаку објави осум партнери кои ќе ги произведуваат овие телефони: Samsung, HTC, LG, Xiaomi, Huawei, ZTE, Asus и Alcatel.
На I/O настанот Google објави и скица од Daydream уредот, кој освен безжичниот контролер, не носи нешто навистина ново, односно неодоливо потсетува на Samsung Gear VR. Сѐ уште нема најава за тоа колку ќе чини, иако лична претпоставка е дека Google ќе биде агресивен, односно ќе постави многу ниска цена, со цел да ја донесе платформата поблизу до што поголем број на корисници.
Извор: Venture Beat, The Verge, Engadget, TechCrunch
