Пред неколку години, кога продажбата на Windows лаптопи паѓаше и растеше онаа на таблетите и лаптопите на Apple, никој не можеше да предвиди дека Microsoft има ас во ракавот со кој ќе ги спаси Windows уредите. Сепак, Surface линијата се покажа како особено успешна, а доказ за тоа се големиот број на купувачи кои досега имале MacBook, а го смениле за Surface.
Како и многу други производители и продавачи, Microsoft има посебна програма со која им ги откупува старите MacBook лаптопи на корисниците, проценувајќи ги до 650 долари, доколку се одлучат да ги заменат за Surface компјутер. Според Брајан Хол, маркетинг директор на Microsoft Devices, оваа година рекорден број на корисници се префрлиле од MacBook на Surface.
Според него, причината за ова се возбудата од големиот број на иновации кои ги има во Surface компјутерите, заедно со разочарувањето за новиот MacBook Pro, особено кај професионалците. Тој доврши со тоа дека секојдневно на интернет излегуваат рецензии, во кои се препорачува Surface, а не MacBook компјутер, што го правело Surface тимот особено среќен.
Од друга страна пак Apple вели дека новиот MacBook Pro е лаптоп на Apple со најмногу преднарачки од кој и да било Pro модел досега, поради што тие морале да го подигнат производството. И покрај тоа, многу корисници веќе се жалат на многу кратко траење на батеријата и чести проблеми и багови со софтверот, што е чудно за производ од Apple.
Наредната година Microsoft ќе лансира наследници на Surface Pro и Surface Book таблет/лаптоп компјутерите, кои сигурно ќе донесат подобрување во сите параметри, а веројатно и некоја нова функционалност, кои дополнително ќе го зацврстат нивното место на пазарот.
Извор: The Verge, Cult of Mac, Digital Trends
