Dell го претстави Wyse Cloud Connect

Првпат претставен како Project Ophelia минатата година, Dell Wyse Cloud Connect е уред нешто поголем од USB стик кој работи на Android оперативниот систем и е наменет да го направи секој монитор или проектор во cloud компјутер. Наменет е за бизнис корисниците и претставува уред преку кој што корисниците може да се поврзат на компаниските cloud апликации или било која виртуелизирана десктоп околина.

Се поврзува на било кој монитор преку MHL/HDMI портата од која што го добива напојувањето, а тоа значи дека уредот нема батерии и нема потреба од негово полнење. Доаѓа со инсталиран Dell Wyse PocketCloud софтвер кој што овозможува пристап до било која физичка или виртуелна десктоп околина, апликации и содржина. Со други зборови овој уред ја трга потребата од носење на лаптоп или таблет компјутер на состаноци, презентации или било какви други бизнис патувања. На интернет се поврзува преку вграден Wi-Fi чип и може да се поврзе до cloud сервисите од било кое место каде што има интернет пристап.

На уредот може да се поврзат тастатура и маус преку Bluetooth или преку mini USB портата. Dell Wyse Cloud Connect спаѓа во категоријата на уреди наречени BYOD (bring your own device) или донеси го својот уред. Замислен е да најде примена кај бизнис корисниците кој работат во канцеларијата и на терен, во образованието, како и за рекламни монитори на разни јавни локации.

Покрај поврзувањето преку Dell Cloud решенијата исто така може да се поврзе и на Citrix, Microsoft или VMware решенија.

Преку софтверот за администрација, Dell Wyse Cloud Client Manager, може да се додели различен пристап и привилегии на секој корисник, па иако е базиран на Android, пристапот до одредени делови може да биде ограничен. Сепак можно е користење и на апликациите достапни преку Play Store.

Dell Wyse Cloud Connect